49 yaşlı şəhidin oğlu: “Atam qollarında yaralı əsgəri ilə birlikdə şəhadətə yüksəlib” - MÜSAHİBƏ + FOTO

49 yaşlı şəhidin oğlu: “Atam qollarında yaralı əsgəri ilə birlikdə şəhadətə yüksəlib” - MÜSAHİBƏ + FOTO
20 Yan 2021 10:00


İkinci Qarabağ müharibəsinin şəhidləri arasında tibb işçilərimiz də var. Onlardan biri də tibb xidməti leytenantı 49 yaşlı Şəmilov Azər Elyas oğludur.

Tibb xidməti baş leytenantı Azər Şəmilov 21 sentyabr tarixində təlimlərə cəlb edilib və elə müharibə başlayan ilk günlərdən ön cəbhədə xidmət edib.

Azərbaycanın ərazi bütövlüyü uğrunda gedən ağır döyüşlərdə iştirak edən şəhidin oğlu Fədayət Şəmilov realpress.az-ın əməkdaşı ilə söhbəti zamanı atasının bir neçə dəfə ağır yaralansa da, xidmətini davam etdirdiyini deyib.

Onun sözlərinə görə, atası Azər Şəmilov barəsində onun döyüş yoldaşları ilə danışıb:

“Atam müharibə zamanı Tərtər (Suqovuşan, Talış), Goranboy (Tapqaraqoyunlu) istiqamətlərində döyüşüb. Həkim yoldaşının sözlərinə görə, atam yüzlərlə əsgəri döyüş meydanından çıxarıb və ilkin tibbi yardımı edib. Əsgərlər belə onun qorxmaz olduğunu deyirdilər. Heç kimin getmədiyi yerlərə atam özü sürünə-sürünə gedib və yaralılara ilkin yardım göstərib”.

“Atam qucağında yardım etdiyi əsgər ilə şəhid olub”

Şəhidin oğlu deyir ki, atasının şəhid olduğu yerlə düşmən postunun arasında 300 metr məsafə olub:

“Şəhid olmamışdan əvvəl bir neçə dəfə yanlarına “Qrad” mərmisi düşüb və yaralanıb. Amma xidmətini dayandırmayıb. Bu barədə mən sonra bilmişəm, yaralandığını evə deməmişdi. Döyüş yoldaşı deyir ki, atam oktyabrın 14-də saat 11-12 radələrində şəhid olub.

Həmin gün onları atəşə tutublar. Atamla döyüş yoldaşı xəsarət alıblar. Daha sonra özlərini toparlayıb, səngərə giriblər. Danışırdılar ki, təcili tibbi yardım avtomobili qarşılarında olub. Amma birdən görüblər ki, irəlidə bir əsgər yaralanıb. Atam döyüş yoldaşını qoymayıb, özü irəli atılaraq, təhlükəli əraziyə girib. Döyüş yoldaşı atama deyib ki, gözlə atəş kəsilsin, təhlükəlidir. Atam isə cavabında “indi getməsəm, cavan oğlandı, qanaxmadan həyatını itirəcək” deyib. Sürünə-sürünə səngərdən yaralıya doğru irəliləyib. Həmin zaman başqa döyüş yoldaşı da bir başqa yaralıya ilkin yardım göstərib.

Bir azdan atam o yaralını çıxarıb, təcili tibbi yardım maşınına gətirib. Orada tibbi yardıma davam edib. Elə həmin vaxt düşmən tərəfindən atılan “Qrad” mərmisi atamın düz yanına düşüb. Döyüş yoldaşı deyir ki, kömək üçün atamın yanına qaçıb, amma gec olub. Atam və qucağında yardım etdiyi İlkin adlı əsgər yerincədə şəhid olublar”.

“Ölümündən bir gün əvvəl evə zəng edib, “Qarabağı alıb, qayıdacağıq” dedi”

Şəhidimiz oğlu ilə sonuncu dəfə oktyabrın 13-də danışıb:

“Zəng elədi, hər zaman olduğu kimi ilk sözü “Narahat olmayın” oldu. Dedi ki, “hər şey yaxşı olacaq. İnşallah Qarabağı alıb, qayıdacağıq. Bu yolda öldü var, döndü yoxdu”.

Mən həmin gün çox narahat idim, sanki hiss edirdim nəsə olacağını. Gözümün qarşısına bəzi səhnələr gəlirdi. Oktyabrın 14-ü atamdan zəng gələr deyə, telefonun başında çox gözlədim. Amma atamdan zəng gəlmədi. Biz zəng edib maraqlandıq, dedilər, hər şey yaxşıdır, atanın başı qarışıqdı, gələndə deyərik.

Sonra bildim ki, elə həmin an şəhid olub atam, sadəcə bizə deməyiblər. Şəhid olma xəbərini ilk olaraq dayımdan aldıq. Atamın şəhid olmasından dörd saat sonra bizə xəbər verdilər.

Bütün bu məlumatları mənə atamın döyüş yoldaşı danışıb. Onun son sözünün, istəyinin nə olduğunu isə heç biri bilmədi. İlkin adlı əsgərlə birlikdə şəhadətə yüksəldi. Müharibə davam edən ərəfədə özü ilə danışırdıq, bizə heç nə danışmırdı. Fəxr edirəm ki, belə qəhrəman, qorxmaz, Vətənə sevgisi olan, öz peşəsini layiqincə yerinə yetirən kişinin oğluyam. Allah bütün şəhidlərimizə rəhmət eləsin, qazilərimizə şəfa versin. Biz onları heç vaxt unutmayacağıq”.

Şəhid Azər Şəmilov 16 il ANAMA-nın Tərtərdə yerləşən bölməsində baş həkim vəzifəsində çalışıb. O, doğulduğu Tərtər rayonu Qapanlı kəndində torpağa tapşırılıb.

Şəhidin Vətənə əmanət iki övladı qalıb.

Xatırladaq ki, Prezident İlham Əliyevin müvafiq sərəncamına əsasən, Şəmilov Azər Elyas oğlu ölümündən sonra “Vətən uğrunda”, “Suqovuşanın azad olunmasına görə” və “Hərbi xidmətlərə görə” medalları ilə təltif edilib.


16 Sent 2023
Hərbi

Naxçıvanda ilk milli hərbi hissənin yaradılması qeyd edildi - FOTO

Naxçıvan Muxtar Respublikasında ilk milli hərbi hissənin yaradılmasının 31-ci ildönümü münasibətilə Əlahiddə Ümumqoşun Orduda silsilə tədbirlər keçirilib.

2 Sent 2023
Hərbi

Ordumuz Ermənistan silahlı qüvvələrinə məxsus PUA-ların idarəetmə stansiyasını məhv edib

Ermənistan silahlı qüvvələrinə məxsus PUA-nın idarəetmə stansiyası məhv edilib.

14 İyun 2023
Hərbi

Ermənilər Naxçıvan istiqamətində mövqelərimizi atəşə tutdular: Cavab tədbirləri görülür

İyunun 14-ü saat 10:00-dan etibarən Ermənistan silahlı qüvvələrinin bölmələri Vedi rayonunun Arazdəyən yaşayış məntəqəsi istiqamətində yerləşən mövqelərindən Azərbaycan Ordusunun Naxçıvan Muxtar Respublikasının Sədərək rayonunun Heydərabad yaşayış məntəqəsi istiqamətində yerləşən mövqelərini yenidən müxtəlif çaplı silahlardan intensiv atəşə tutub.

12 Apr 2023
Hərbi

Ermənilərin itkilərinin sayı AÇIQLANDI

Ermənistan Müdafiə Nazirliyi Ermənistan Silahlı Qüvvələrinin təxribatı nəticəsində 4 hərbçisinin həlak olması, 6 hərbçisinin isə yaralanması barədə məlumat yayıb.

31 Yan 2023
Hərbi

Azərbaycan Ordusunun tankları Türkiyədə keçirilən təlimlərdə manevrlər edib

Türkiyə və Azərbaycanın zirehli bölmələri Türkiyənin Qars şəhərində keçirilən “Qış təlimi - 2023” təlimlərində manevr imkanları yoxlanılıb. Manevrlərdən əvvəl tanklara texniki qulluq və nəzarət həyata keçirib.