Bakıda keçirilən Avropa Gənclərinin Olimpiya Festivalı (EYOF) çərçivəsində güləş yarışlarının sonuncu günündə daha beş idmançımız finala çıxıb.
Realpress.az xəbər verir ki, sərbəst güləşdə Kənan Heybətov (-51 kq) Ukrayna təmsilçisini tam üstünlüklə məğlub edib – 12:2. Daha sonra Finlandiya idmançısına heç bir şans tanımayan (10:0) Kənan yarımfinala yüksəlib.
Yunan güləşçini də vaxtından əvvəl yenən (12:1) Heybətov finala çıxıb. Onun finaldakı rəqibi rusiyalı Rüstəm Dolayev olacaq.
Cəbrayıl Hacıyev (-65 kq) ilk görüşdə gürcü güləşçi üzərində inamlı qələbə qazanıb – 13:3. Türkiyə pəhləvanını bir dəqiqə ərzində diz çökdürən Hacıyev 1/4 finala yüksəlib. Bu mərhələdə Yunanıstan təmsilçisi də yığmamızın üzvü qarşısında aciz qalıb. Cəbrayıl yarımfinalda İsveçrə idmançısına da güzəştə getməyib. Son üç görüşündə 10:0 qalib gələn pəhləvanımızın finaldakı rəqibi rusiyalı Batırbəy Tşkovrebovdur.
Yunan-Roma güləşində Elmir Əliyev (-51 kq) ilk hissədə Norveç təmsilçisini sıradan çıxarıb – 8:0. Daha sonra çətinliklə də olsa, Rumıniya idmançısından güclü olub – 2:1. Yarımfinalda gürcü rəqibini 6:1 qalib gəldiyi vaxtda “tuşe” ilə devirən həmyerlimiz adını finala yazdırıb. Onun həlledici görüşdəki rəqibi ukraynalı Sanya Yakovlevdir.
Xasay Həsənli (-65 kq) ilk mərhələdə Yunanıstan idmançısını məğlub etməkdə çətinlik çəkməyib – 7:0. Finlandiya və İsveçrədən olan rəqiblərinə də 3:1 və 10:2 hesabı ilə qalib gələn Xasay adını yarımfinala yazdırıb. Ukrayna güləşçisiylə gərgin mübarizə şəraitində keçən görüşdən də qalib ayrılan (7:4) Həsənli finala yüksəlib. O, qızıl medal uğrunda Almaniyanı təmsil edən Deni Nakayevlə qarşılaşacaq.
Qadın güləşində Elnurə Məmmədova (-53 kq) gərgin keçən qarşılaşmada macar rəqibindən son xal prinsipi ilə üstün olub – 4:4. Daha sonra Ukrayna və Rumıniya idmançıları üzərində əzmkar qələbə qazanan (müvafiq olaraq 7:2 və tuşe) Elnurə finala adlayıb. Onun finaldakı rəqibi rusiyalı Polina Lukinadır.
Birgül Soltanova (-57 kq) startda Rusiya güləşçisinə uduzub – 2:2. Sonuncu xalı qazandığı üçün qələbə rəqibə verilib. Lakin rusiyalı güləşçi finala çıxmadığından, Birgül yarışı medalsız başa vurub.
Nigar Mirzəzadə (-65 kq) yarışa alman rəqibini yenməklə başlayıb – 8:0. Ancaq o, 1/4 finalda türkiyəli idmançıya müqavimət göstərə bilməyib – 0:10. Rəqib finala yüksəldiyi üçün təsəlliverici görüşə çıxan Nigar britaniyalı güləşçiyə rahat qalib gələrək (10:0) bürünc medal uğrunda qarşılaşmaya vəsiqə qazanıb. Onun rəqibi polşalı Zofia Polovçik olacaq.
Qeyd edək ki, medal qarşılaşmaları bu gün saat 16:00-da başlayacaq.
Azərbaycan paraüzgüçüsü Raman Saley Portuqaliyanın Madeyra şəhərində keçirilən Avropa Açıq Çempionatında bürünc medal qazanıb.
Kişi şahmatçılar arasında keçirilən Azərbaycan çempionatına yekun vurulub.
Azərbaycan Boks Federasiyasının Mətbuat Xidmətindən Oxu.Az-a verilən məlumata görə, 63,5 kiloqram çəkidə mübarizə aparan yığma üzvü moldovalı Alexandru Parasçivlə qüvvəsini sınayıb.