Aleksandr Lukaşenko Heydər Əliyev Mərkəzində olub (FOTO)

Aleksandr Lukaşenko Heydər Əliyev Mərkəzində olub (FOTO)
29 Noy 2016 15:41

REALPRESS.AZ TREND.AZ -a istinadən xəbər verir ki, 

Belarus Respublikasının Prezidenti Aleksandr Lukaşenko Heydər Əliyev Mərkəzində olub.

Trend-in məlumatına görə, Heydər Əliyev Mərkəzinin direktoru Anar Ələkbərov Prezident A.Lukaşenkoya Mərkəzin fəaliyyəti barədə məlumat verib.

Bildirilib ki, Mərkəz Azərbaycan xalqının ümummilli lideri Heydər Əliyevin dövlətçilik irsinin öyrənilməsi və tədqiqi, eyni zamanda, ölkəmizin tarixi və mədəniyyətinin tanıdılması istiqamətində fəaliyyət göstərir. Bu baxımdan, Mərkəzin həyata keçirdiyi layihələr, burada təşkil edilən mühüm beynəlxalq tədbirlər barədə məlumat verilib.

Mərkəzdəki Heydər Əliyev Muzeyi ilə tanış olan A.Lukaşenkoya məlumat verilib ki, Muzey təşkil olunarkən Ümummilli Liderin həyat və fəaliyyətinin müxtəlif dövrlərinin əks olunmasına xüsusi diqqət yetirilib. Muzey, həmçinin Azərbaycan tarixinin öyrənilməsinə böyük imkanlar yaradır. Bu baxımdan, interaktiv formada təqdim edilən eksponatlar, müxtəlif videomateriallar xüsusi əhəmiyyətə malikdir.

Belarus Prezidenti Muzeyin ayrı-ayrı bölmələri, eləcə də 1969-cu ildən 2003-cü ilədək ulu öndər Heydər Əliyevin Azərbaycana rəhbərlik etdiyi dövrlərdə xidməti istifadəsində olan avtomobillərə, Heydər Əliyevin digər dövlət başçıları, o cümlədən A.Lukaşenko ilə keçirdiyi görüşlərə dair materialların yer aldığı “Beynəlxalq əlaqələr” bölməsinə baxıb.

Mərkəzdə “Azərbaycan inciləri: tarixin axarında” sərgisi ilə tanışlıq zamanı bildirilib ki, Azərbaycanın tarixini və mədəniyyətini əks etdirən bu ekspozisiyada ölkənin çoxəsrlik tarixi, mədəni irsinə dair eksponatlar nümayiş olunur. Belarus Prezidenti “Mini Azərbaycan” sərgisi ilə tanış olarkən qeyd edilib ki, bu ekspozisiyada Bakıdakı və Azərbaycanın regionlarındakı tarixi memarlıq abidələri və bir sıra müasir binaların maketləri nümayiş olunur. Sərgi Azərbaycanla virtual tanışlıq imkanı yaradır.

Sonra Belarus dövlətinin başçısı Heydər Əliyev Mərkəzində “Klassik avtomobil sərgisi” ilə tanış olub. Diqqətə çatdırılıb ki, sərgidə avtomobilin yarandığı ilk dövrlərdən - XIX əsrin sonlarından başlayaraq Almaniya, ABŞ, İtaliya, Fransa, Böyük Britaniya və keçmiş SSRİ-də istehsal olunmuş avtomobillər nümayiş etdirilir.

Belarus Prezidentinə, həmçinin Mərkəzin binası barədə məlumat verilib. Qeyd olunub ki, dünya şöhrətli memar Zahi Hadidin layihəsi əsasında inşa edilmiş Mərkəz dünya memarlıq inciləri siyahısına daxil edilib. Burada rəsmi qəbullar, beynəlxalq konfranslar, iclaslar və digər tədbirlərin keçirilməsi üçün geniş imkanlar var.

Daha sonra Belarus Prezidenti A.Lukaşenko Heydər Əliyev Mərkəzinin xatirə kitabında ürək sözlərini yazıb.

Sonda dövlət başçısına xatirə hədiyyəsi təqdim edilib.


17 İyun 2024
Siyasət

Binəqədidə Tibb İşçiləri Günü münasibətilə tədbir keçirilib

İyunun 12-də Yeni Azərbaycan Partiyası Binəqədi rayon təşkilatı və Tibbi Ərazi Bölmələrini İdarəetmə Birliyinin birgə təşkilatçılığı ilə 17 iyun - Tibb İşçilərinin Peşə Bayramı Günü münasibətilə tədbir keçirilib. Tədbirdə YAP Binəqədi rayon təşkilatının sədri Vüsar İsmayılov, millət vəkili Kamaləddin Qafarov, Tibbi Ərazi Bölmələrini İdarəetmə Birliyinin icraçı direktorunun müşaviri Pərvin Əkbərov, Binəqədi rayonunda fəaliyyət göstərən tibb işçiləri iştirak ediblər.

16 İyun 2024
Siyasət

Kamaləddin Qafarov: “Şuşa Bəyannaməsi hər iki ölkə üçün mühüm tarixi sənəddir”

“Ulu Öndər Heydər Əliyevin “Türkiyə və Azərbaycan bir millət, iki dövlətdir” və Mustafa Kamal Atatürkün “Azərbaycanın sevinci bizim sevincimiz, kədəri bizim kədərimizdir” aforizmləri, əslində, iki ölkə arasında strateji müttəfiqlik əlaqələrinin qısa konseptual formada ifadə edilmiş ideoloji əsası olub. 2021-ci ilin iyunun 15-də Azərbaycan və Türkiyə Prezidentləri tərəfindən Şuşa şəhərində iki qardaş ölkənin imkanlarının birləşdirilməsini və maraqlarının birgə müdafiəsini nəzərdə tutan unikal tarixi sənədin – “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi”nin imzalanması ilə bu münasibətlər artıq rəsmi xarakter almış oldu”.

15 İyun 2024
Siyasət

Kamaləddin Qafarov: “ Azərbaycan bu gün qüdrətli bir dövlətə çevrilib”

“Ulu Öndər Heydər Əliyevin adı ilə bağlı olan Milli Qurtuluş Günü Azərbaycan tarixinin ən şanlı qürur səhifələrindən biridir. Dövlət müstəqilliyimizin bərpa olunmasından sonra keçən ilk iki il ərzində ölkəmizin üzləşdiyi ciddi iqtisadi problemlər getdikcə qarşısıalınmaz xaotik proseslərin başlanmasına yol açmışdı. Bu vəziyyət isə öz növbəsində, respublikada hakimiyyəti ələ keçirmiş səriştəsiz və məsuliyyətsiz qrupların dağıdıcı fəaliyyətləri ilə uzlaşaraq ölkəni siyasi böhrana gətirib çıxarmışdı. Vətəndaş müharibəsi, ölkənin bir neçə kiçik marionet dövlətlərə parçalanması və Azərbaycanın vahid suveren ölkə olaraq dünyanın siyasi xəritəsindən silinməsi xalqı gözləyən real perspektivlər idi”.

14 İyun 2024
Siyasət

Bakı-Qazax yolunda iki yeni piyada keçidi inşa olunur

Azərbaycan Avtomobil Yolları Dövlət Agentliyi Bakı-Ələt-Qazax-Gürcüstanla dövlət sərhədi avtomobil yolunun 69-cu km-də yolun hər iki hərəkət istiqamətində (Qaradağ rayonunun Ələt qəsəbəsindən keçən hissə) iki yerüstü piyada keçidinin tikintisini aparır.

14 İyun 2024
Siyasət

Nazir: Gələn il bəzi summativ qiymətləndirmələrin ləğvi məsələsinə baxıla bilər

Şagirdlərin dərs yükünün azaldılması istiqamətində bəzi summativ qiymətləndirmələrin ləğvi məsələsinə 2025-ci ildə baxıla bilər.